ДУЛААНЫ ТӨЛБӨРТ ӨӨРЧЛӨЛТ ОРУУЛАХ ТУХАЙ

 АСУУДАЛД НИЙТИЙН СОНСГОЛ ХИЙЛЭЭ.

Захиргааны Ерөнхий хуулийн 62.2-т “Нийтийн ашиг сонирхол, хүний эрх, хууль ёсны ашиг сонирхлыг хөндөх тохиолдолд захиргааны хэм хэмжээний актын төсөлд нийтийн санаа бодлыг тусгах зорилгоор хэлэлцүүлэг зохион байгуулж, оролцох боломжоор хангах бөгөөд эрх, хууль ёсны ашиг сонирхол нь хөндөгдөх бүлгийн хүрээнд хэлэлцүүлэг заавал хийнэ.” хэмээн заасны дагуу олон нийтээр хэлэлцүүлж, саналыг тусгахаар нээлттэй хэлэлцүүлгийг /2019.03.26/ зохион байгууллаа. 

Хэлэлцүүлгийг ИТХ-ын ажлын албаны дарга Б.Мөнхбаяр удирдаж, ЭМТНаран ОНӨААТҮГазрын дарга Д. Ариунболд, инженер Ж.Батцэцэг нар холбогдох мэдээллийг танилцуулсан бөгөөд сумын 1 дүгээр багийн 36 иргэн, төсөвт байгууллага, аж ахуйн нэгж байгууллагын төлөөлөл оролцож, саналаа илэрхийллээ. 

Одоогийн байдлаар Дархан-Уул аймгийн Эрчим хүчний зохицуулах зөвлөлийн 2008  оны  08/01 дугаар тогтоолоор батлагдсан үнэ тариф буюу айл өрхийн 1м2 350 төгрөг, аж ахуйн нэгж 1м3 1000 төгрөг, төсөвт байгууллага 1м3 1300 төгрөгийн төлбөр авч үйлчилж байгаа бөгөөд уг үнэ тарифыг нэмэгдүүлж, нэг өрхөөс 1м2 500 төгрөг, аж ахуйн нэгж 1м3 1300 төгрөг, төсөвт байгууллага 1м3 1500 төгрөгийн төлбөр авах нэмэлт өөрчлөлтийн  хэлэлцүүлэгт оролцсон иргэд дэмжиж буйгаа илэрхийллээ. 

Иргэдээс халаалтын чанарыг сайжруулах, даралтын зөрүүг гаргах, тоног төхөөрөмжөө сайжруулах, нийлүүлж байгаа нүүрсний чанарт анхаарах, өр авлага барагдуулах зорилгоор хэрэглэгчийг цэвэр ус дулааныг хязгаарлахдаа орцоор нь бус тоотоор нь хязгаарлаж байх саналуудыг гаргаж байлаа.